En Leed för’n Kring Sebarg – De Gewinner sünd utwählt

De Kring Sebarg hett nu sien egen plattdüütsche Hymne. Twölf Bidrääg hebbt Schrieverslüüd ut den Kring Sebarg, ut de Stadt Sebarg, ut Wentorf un Lübeck bistüert. Dorbinnen schrievt se  vun de Natur, de Wischen, de Moore un de Woolden in’n Kring Sebarg, man ok vun Winnetou un den Kalkbarg, vun’t Kultur- un Wirtschopsleven. Nu hett de Jury de Gewinner utsöökt: Den eersten Pries un dormit 250 € hett Petra Jessen kregen, den tweten Pries (150 €) Prof. Dr. Peter Zabel, den drütten Pries (100 €) Eckard Hidde. Düsse Priese hett de Sparkass Südholsteen möglich maakt. De Sünnerpries vun’t Nedderdüütschzentrum Mölln, en Instrumentengutscheen över 100 €, gung an Ulrich Gröhn.

Wiel nich all Texten op Platt afgeven worrn sünd, hebbt Thorsten Börnsen un Nikos Saul de hoochdüütschen Texte op Platt översett. Nu maakt sik de Karkenmusikdirektor Andreas Mauer-Büntjen an’t Wark un vertonen Petra Jessen ehr Gedicht. Opführt warrt dat an’n 14. Mai, Klock 7 bi en Kunzert in de Marienkark in Sebarg.

In de Jury, de den Pries vergeven hett, weren Thorsten Börnsen vun’t Nedderdüütschzentrum, Andreas Mauer-Büntjen, Joachim Brunkhorst (Studiendirektor a. D.), Peter Stoltenberg (Vörsitter vun’n Heimatvereen Sebarg) un Prof. Asmus J. Hintz (Hoochschool för Musik un Theater Hamborg).

Plattdüütsch Barcamp in Leck
Sett joon plattdüütschen Vereen op uns Kort vun Holsteen!
Nach oben