Keen weeten will, wo in Holsteen dat överall plattdüütsche Theatervereen gifft, oder welke Museen en Platt-Anbott maakt, schall dat in Tokunft op de ni’e interaktive Landkort vun Holsteen „Wo finnst‘ wat op Platt?“ nakieken können. Opstellen deit düsse Kort dat Zentrum för Nedderdüütsch in Holsteen. Se schall en Deel vun dat rieke nedderdüütsche Leven in Holsteen sichtbor maken. Dormit dat klappt, gifft dat en Formular op de Homepage vun’t Nedderdüütschzentrum, wo plattdüütsche Vereen, Snackkrings, Gillen un so wieder sik indragen könnt. Finnen kann een dat un de Kort sülvst hier: https://www.niederdeutschzentrum.de/platt-in-holsteen-de-kort/
Op de Kort indragen sünd nu al de plattdüütschen Modellscholen. Dorto kamen schüllt noch Theatervereen, Museen mit Platt-Anbott, Snackkrings, Zeitungen mit plattdütsche Inholden, plattdüütsche Gillen un Vereen, Behörden, in de een Platt snacken kann, un Olenheime mit Platt-Anbott.
Sodennig schall de Kort ok dorbi helpen un vernetten sik mit annere plattdüütsche Vereen in Holsteen. Maakt mit un dreegt joon plattdüütschen Snackkring oder Theatervereen in!
En Leed för'n Kring Sebarg - De Gewinner sünd utwählt
„Schölers leest Platt“ – Regionalentscheid in Mölln
