An’n 23. Oktober gifft dat in de MOTTE in Hamborg aktuelle plattdüütsche Musik un Poetry-Slam-Texten to hören. Präsenteren deit de Veranstalten de plattdüütsche Songcontest Plattbeats.
Dorbi sünd de Singer-Songwritersche NORMA, de Rapper LPP 143 un de Schriever Nikos Saul. Modereren deit Thorsten Börnsen. Dat Stadtdeelzentrum MOTTE liggt in Hamborg in de Rothestraße 48. Rin kann een an’n 23. af 19:00, losgahn deit dat üm 19:30. Bi’t Ringahn mutt een nawiesen, dat een tegen Covid empt oder testet is oder Covid harr un wedder gesund is.
De Singer-Songritersche NORMA maakt glieks op dree Spraken Musik: op Platt, op Freesch un op Hooch. Boren un opwussen is se op Föhr, man fröh hett se dat na Hamborg trocken. In’n Oktober 2020 is ehr plattdüütsche Single „Ganz goot“ rutkamen. För dat Enn vun 2021 is en Album heel un deel op Platt plaant.
LPP 143 ut Kiel-Gaarden rappt op Platt un Hooch. He sülvst nöömt sien Rap „Oldschool“ mit en düchtige Portion Woortspelen. Platt hett för em bi’t Rappen den Vördeel, dat dat en beteren Flow as Hoochdüütsch hett un sik beter gau rappen lett. Opstunns arbeit he an en ni’et Album, dat in’n Winter rutkamen schall.
Nikos Saul ut Mönster maakt Musik un schrifft Texten op Platt, to’n Bispeel is he Liddmaat in en Ship-Hop-Band un en Shantychor. In de MOTTE warrt he plattdüütsche Poetry-Slam-Texten vördragen.
Thorsten Börnsen organiseert den Songcontest Plattbeats un hett dat Leid vun’t Nedderdüütschzentrum in Mölln.
