To’n 22. Mal hett dat an’t verleden Wekenenn bi de Carl-Toepfer-Stiftung in Hamborg de plattdüütsche Bookmess geven. En Barg Lüüd sünd al to den Startschööt in den Lichtwarksaal in de Neanderstraat kamen. Loos güng dat mit Yared Dibaba sien Lesen. Dor weer’t denn ok proppenvull. Book vun’t Johr 2019 is „De Tied blif Baas“ worrn. Dat is en Tosamenstellen vun Warken vun den emslännischen Schrieversmann Karl Sauvagerd (1906-1992). Jüst so as in de letzten Johren düch mi de Bookmarkt för Kinner un jung Lüüd ok in düt Johr wedder an’n intressantesten. So en Book is to’n Bispeel „Kumm wi sägeln“ vun Viviane Eisold. In dat warrt in en wunnerschöön Gedicht vun en lütt Papeerschipp vertellt. Dat geiht verschütt, is in Wirklichkeit aver op grode Reis. Üm en Reis geiht dat ok in „Mäh! Maa! Möh! Versteihst?“ vun Anke Ortlieb. In düt Book büxt nämlich dree Schaap ut, as jümehr Buer starven deit. Un nu maakt se sik op de Söök na en nie’en. Dat wichtigste Kriterium för ehr Utwahl: He mutt platt snacken. Man vör dat Happy End luurt en Barg Avendüer op jüm, denn dat is gor nich licht un finnen so en.
Up dat Bild baben is Christoph Prang to sehn, de ut sien Book „In de Nootopnahm” leest.
Plattbeats 2020 - Eröffnung mit Klaus-Groth-Betoch
„Platt Together“ geiht in 'ne ni'e Runn - düt Mal in Holland
