www.plattradio.com – ünner düsse Adress finnt een nu aktuelle Narichten un Bidrääg vun de niege Medienplattform Plattradio. De Redakschoon gifft dat siet Anfang Juli. Se sitt bi den Sleswig-Holsteenschen Heimatbund un warrt föddert vun dat Land Sleswig-Holsteen. De Landdag harr in’n Maartmaand bekräftigt, dat de niege Redakschoon över den Lannshuusholt betahlt warrn schall. “En grote Saak för uns lütte Spraak”, freut sik Jan Graf. So en Redakschoon, de seriös över Welt un Region berichten schall un dorbi de plattdüütsche Spraak mit Bedacht wieder utbuen – de harr dat bet nu noch nich geven, so de Redakschoonsbaas. Tohopen mit Graf tellt Dörte Riemer un Arne Lentföhr to dat lütte Redakschoonsteam. En Redakschoonsassistenz warrt noch söcht, Bewarvens sünd willkamen.
Blangen de niege Nettsiet plattradio.com bringt Plattradio sien Narichten ok as Podcast un in Social-Media-Kanals ünner de Lüüd. Vunaf den 1. Septembermaand sennt Plattradio denn jümmers maandags bet friedags vun Kl. 7.00 – 8.00 op de Wellen vun den Apen Kanal Sleswig-Holsteen live. Mit den Apen Kanal tellt ok de Noorddüütsche Rundfunk (NDR) in Sleswig-Holsteen to de Kooperatschoonspartners. Vun de Kollegen bi dat Lannesprogramm NDR 1 Welle Nord kriegt de Plattradio-Makers morgens de hoochdüütschen Narichten un bringt ehr in’t Plattdüütsche. Opto kann Plattradio Audiomaterial vun den NDR bruken för de redakschonelle Arbeit.
Akschoonsweek för Dithmarschen - Programm steiht fast
Thorsten Börnsen: Afscheed as Leiter vun't Nedderdüütschzentrum Holsteen
