Leve Mitstrieders/chen,
an’t Enn is denn allens ganz fix gahn: To’n 1. September heff ik bi’t Lännerzentrum Nedderdüütsch in Bremen anfungen. Dor arbeit ik nu as Geschäftsföhrer.
Un sodennig warrt dat bilütten ok mal Tiet un seggen Atschüss.
Dat weer en schöne Tiet as Leiter vun’t Nedderdüütschzentrum in Holsteen. Un dorför müch ik mi bi all bedanken, mit de ik över de verleden söven Johren tosamenarbeidt heff. Veel Minschen hebbt mi bi mien Arbeit Stütt geven. Ahn düssen Wind in’t Krüüz, weer dat nix worrn.
Sünnerlich de Lüüd, de ehrenamtlich arbeiden doot, hebbt düchtig Indruck op mi maakt. Woveel daan warrt för’t Plattdüütsche in Krings un Speeldelen, Verenen un Verbännen is gewaltig.
Un dat bün ik wies worrn in de letzten Johren: De plattdüütsche Landkoort in Holsteen is groot un bunt.
In vele Regionen gifft dat meist in jede Dörp en plattdüütsche Theatergrupp. Un in vele Steden maakt all mit: Kulissen warrt buut, Kostümen sniedert. Annern sitt an de Kass oder seggt liesen wat to, wenn en vun de Schauspelers mal mit ehr Text fastsitten doot. Buten vör de Döör verköfft de Friewillige Füerwehr Braatwust, Beer un Brause. Dat ganze Dörp is op de Been. Plattdüütsch Theater is veel mehr as man blots en Kommedie an’n Sünndagnamiddag. Männichmal is dat dat Hart vun’t Dörp.
Mit Hartbloot ok sünd de Lüüd to Gang, de in de Scholen, Kitas un Kinnergoorns gaht un ünnerrichten dor ehr Moderspraak. Se doot en heel wichtig Wark. Ahn düsse ehrenamtlich Schoolmeisters/chen wöör dat nich gahn un vele Lütten kregen vun Plattdüütsch nix mit. Un jüst för de Kinners is dat wichtig, dat jüm de Spraak mööglichst fröh al in de Mööt kümmt. Vele besinnt sik later noch lang dorop, un hebbt siet fröhe Kinnerdaag den Klang vun’t Plattdüütsche in’t Ohr un männichmal later denn ok op de Tung. De Samen is leggt un kann opgahn.
Un wenn’t goot löppt, denn geiht dat in de School foorts wieder. An vele Scholen in Holsteen ünnerricht Schoolmeesters/chen Nedderdüütsch. Vele vun de ölleren sünd mit Platt opwussen, annern hebbt dat frisch an de Uni lehrt un geevt dat nu wieder. De School is vundaag en heel wichtig Steed un lehren dat Kulturgoot “Plattdüütsche Spraak”.
En wichtige Deel vun’t plattdüütsche Kulturleven is dat Möllner Autorendrepen. Siet 17 Johren hebbt wi Schrieverslüüd ut ganz Noorddüütschland bi uns in Mölln to Gast, de ehr Geschichten un Gedichten op den Stadthauptmannshoff vörstellen doot. Sodennig is dat Holsteener Zentrum al lang en Steed, wo een aktuelle Literatur op Nedderdüütsch to hören kriggt. Man jüst so wichtig is dat Drepen för den Uttusch över Gedanken un Ideen, Anregen un Inspiratschoon. En Reeg Schrieverslüüd kaamt al siet vele Johren jümmers wedder un to vele gifft dat twüschentiets en fründschaplich Kuntakt.
All twee Johr kunnen wi ok op den Möllner Stadthauptmannshoff en Regionalentscheed vun den Leeswettstriet “Schölers leest Platt” organiseren. De Wettstriet hett jedet Mal dat Thema “Plattdüütsch” in heel vele Scholen vun’t Land un Schölers in’t Nedderdüütschzentrum bröcht. Hier hebbt wi eng tosamenarbeidt mit den Sleswig-Holsteenschen Heimatbund, Leespaten ut de Region un de Stiften Hartogdoom Loonborg.
En intensive Tosamenarbeit ok gifft dat mit de Matens vun den Biraat Nedderdüütsch vun den Landdag un den Utschuss för Nedderdüütsch un Freesch vun den Heimatbund.
Sünnerlich müch ik mi bi den Biraat Nedderdüütsch vun de Stiften Hartogdoom Loonborg för dat feine Tohoopwarken bedanken. Wi hebbt in de verleden Johren vele schöne Veranstalten tosamen op de Been stellt, dücht mi. Ik mag hapen, ok mien Nafolger/sch kann op düsse Ünnerstütten tellen.
De besten Grötens
Thorsten Börnsen
