Vertellen vun fröher – Vertellcafé mit’ Zentrum in Sövenbööm

Dor weer düchtig wat loos an’n verleden Sünnavend, den 24.09.22, in’t Gemeenhuus vun Sövenbööm (Siebenbäumen). Inlaadt hett de Karkengemeen Sövenbööm. Tohoop mit dat Nedderdüütschzentrum hebbt se en Vertellcafé op de Been stellt. To ünnerscheedlich Themen hett dat Gespreeksrunnen geven:  Op de Dischen legen Billers, de dat Dörpsleven mehrstendeels in de 50er un 60er Johren wiesen deen. In utleggte Bildbännen kunn een tosätzlich noch blädern un Fotos finnen, de Handwark, Buerweertschop un Huusarbeit vun vör 100 Johren vörstellen deen. Duer ok nich lang, un de Lüüd kemen mit’nanner in’n Snack.
Veel hett sik ännert in de Twüschentiet. Ut de Düütschen is en Volk vun Autofohrers worrn. De Flurbereinigung hett dat Land ümkrenpelt. Un Plattdüütsch is weniger worrn, ok op’t Land. Wi hebbt över düsse Verännern snackt. Ok dörver, dat de ni’e Tiet villicht wedder ole Oorten to weertschopen bruken deit.